MALAY, Aklan — Sambilog patay, daywa naninahan sa pagkahueog it delivery truck sa banglid nga sakop it Brgy. Yapak sa isla it Boracay.
Ginkilaea ro namatay nga si Randy Ambagan, 27-anyos ag residente it Brgy. Libertad, Nabas samtang, padayon nga ginabueong sa Ciriaco Tirol District Hospital ro mga naninahan nga ginakaeakipan it driver nga si RJay Rapiz ag pahinante nga si Jaymar Donato.
Suno kay P/Capt. Jesus Cambay III, deputy chief of police it Malay Municipal Police Station, nakaangkon it mechanical failure ukon nadueaan it preno ro truck nga may karga nga semento paadto sa andang kliyente kat maga-u-turn kunta ro behikulo bangud sa saea nga daean ro andang ginaagyan.
Bangud sa mabug-at ro kargamento ag nadueaan it preno ro saeakyan hay nahueog raya sa banglid nga kapin sa 30 metro ro kataason nga ginkamatay insigida it sambilog sa pahinante bangud sa uwa eagi raya nakaeompat ag daywang iba pa ro naninahan.
Ginpahayag dugang ni P/Cap. Cambay nga posibleng magapangatubang gihapon sa nagakaigong kaso ro nasambit nga driver.
Ro aksidente hay padayon pang ginaimbestigahan it Malay Municipal Police Station para sa nagakaigong disposisyon.
