KALIBO, Aklan — Sambilog ro patay matapos nga magbueungguan ro daywang tricycle sa Jaime Cardinal Sin Avenue, Kalibo.
Base sa report, madasig nga bumangga ag inapok ro driver it tricycle nga si Edmund Lachica, 26, residente it Brgy. Tayhawan, Lezo matapos imaw nga bumangga sa kasubeang nga kaparehong tricycle.
Gindeklarang dead on arrival ro biktima sa provincial hospital matapos nga mag-angkon it grabeng lastro sa ueo.
Ginasugid nga madasig ro pagpadaeagan ni Lachica sa anang ginamaneho nga tricycle halin sa banwa it New Washington ag paagto kunta sa banwa it Kalibo, apang pag-abot sa nasambit nga lugar hay bumangga raya sa tricycle nga hana kunta nga maliko sa Martelino St. nga ginamaneho ni Jovel Goleña, 41, residente it Brgy. Andagao, Kalibo sakay ro tatlong pasahero.
Matapos nga mataw-an it nagakaigo nga medikasyon, insigidang nakaguwa sa ospital ro driver nga si Goleña kaibahan ro anang mga pasahero.
