UPDATE : KALIBO, Aklan — Arestado ro sambilog sa daywang riding in tandem nga ginaturo nga suspek sa pagbaril-patay sa dating drug pusher ag presenteng meat vendor sa Brgy. Jalas, New Washington.
Sa interview it Bombo Radyo, hugut nga ginpamalibaran ni Jimmy Ramos, 61, residente it Sitio Bogacay sa nasambit nga barangay nga may kahilabtanan imaw sa pagpatay sa biktimang si Roljun de Pedro Tejada, 36, ag residente it nasambit nga lugar.
Suno kana nga idtu imaw sa anang baeay kat matabu ro krimen.
Apang sa pihak, ginkasuhan imaw it murder it New Washington Police Station, apang ko ulihi hay ginpapanaog sa homicide.
Nasayuran nga positibong ginkilaea ni Perlyn Tejada, 31, asawa it biktima nga si Ramos sigon ro driver it getaway motorcycle vehicle nga ginsakyan it owa pa nakilaea nga gunman.
Nauna kara, base sa paunang imbestigasyon it New Washington Police Station, magasarado eon kunta it anang pwesto ro biktima kat gulpi eamang imaw nga gin-ipingan it motorsiklo sakay ro daywang mga suspek kun sa siin, insigidang ginbaril si Tejada nga tinamaan sa dughan ag pisngi nga naging rason it anang insigidang pagkamatay.
Nasayuran nga ro nasambit nga biktima hay dating nakulong sa Aklan Rehabilitation Center (ARC) sa kasong pag-eabag sa Republic Act 9165 ukon Comprehensive Dangerous Drugs Act of 2002 apang temporaryong nakahilway sa idaeum it plea bargaining program it gobyerno may limang buean pa eamang ro nakataliwan.
Samtang, si Ramos hay sangka drug surenderee man sa banwa it New Washington.
