KALIBO, Aklan —Ginpaboran ko mga miyembro it Compliant Association of Boracay (CAB), ro ginaproponer it Department of Environment and Natural Resources (DENR) nga ipasarado ro isla it sang buean kada dag-on agud taw-an it kahigayunan nga makapahuway.
Suno kay CAB board of directors Butch Sacay nga uwa it katumbas ro sang bueang pagsakripisyo agud mapabilin ro kaayusan ag kalimpyuhan sa Boracay.
Aminado si Sacay nga mabahoe ro magiging lugi kara sa mga negosyante, apang kon para sa kamaeayran it isla hay haom sandang magsakripisyo.
Ro ginahinyo eamang sigon nanda hay isakto ro closure kon bukon it peak season ukon tag-uean agud sangkiri eamang ro mga turistang nagasueod.
Nagaeaum sigon ro mga negosyante sa isla nga ro pagsa-ayos sa Boracay hay makaangkon it positibong epekto sa palibot ag ekonomiya.
