KALIBO, Aklan— Ginkalipay it Boracay Inter-Agency Task Force (BIATF) ro positibong pagbaton it mga residente ag turista sa nakit-ang pagbag-o sa isla sa nagapadayon nga rehabilitation effort it gobyerno.
Raya hay kasunod it sang dag-on nga anibersaryo it Boracay closure ko Abril 26.
Suno kay Boracay Inter-Agency Rehabilitation Management Group (BIARMG) General Manager Natividad Bernandino, mas maabong ro turista ro nagpabutyag nga magabisita sa isla kasunod it mga promotion nga ginahimo it Department of Tourism (DoT).
May kaangtanan kara, “manageable” suno kana ro carrying capacity halin kat ginbuksan ro isla sa publiko ko Oktubre 28.
Hugot man sigon nga ginapatuman it Inter-agency ro rules and regulation nga katuyuang ma-sustain ag ma-maintain ro nagapadayong rehabilitasyon nga ginaeaumang matapos sa 2020.
Samtang, kapin sa 13,000 nga mga displaced workers eon ro nakabalik sa andang mga trabaho sa Boracay.
Pamatuod eamang sigon raya nga balik eon sa normal ro negosyo sa isla.
Madumdumang masobra sa 17,735 workers halin sa mga establisyimento ag kapin sa 2,005 informal sector workers ro naapektuhan it pagpasarado sa Boracay sa sueod it an-om nga buean ko 2018.
