KALIBO, Aklan—Patay eun kat masapwan ro sangka 20 anyos nga eaeaki matapos magbigti sa sueod it anang kwarto sa Poblacion, New Washington.
Suno kay P/Cpl. George Regalado it New Washington PNP, posibleng bandang alas 10:00 ukon alas 11:00 kahapon it agahon kat ginhimo it biktimang ginkilaea kay Don Monjay Amante ro anang pagpakamatay gamit ro eubid nga nylon samtang naga isaeahanon sa andang panimaeay.
Ginapahayag dugang nga mismong ro lola it biktima ro nakakita kara samtang nagabitay sa bamboo trusses it anang kuwarto.
Sa pihak kara, nagapati man ro pamilya it biktima nga owa natabong ‘foul play’ sa pagpakamatay kara mas kapin pa ag owa it nakit-an nga mga gasgas ukon lastro sa anang kaeawasan.
Ginasugid nga daywang adlaw eun rayang tulala ag owa nagahambae.
Problema man sa pamilya ro ginapanan-aw nga rason kon ham-an nga nahimo it biktima nga tapuson ro anang kabuhi.
