KALIBO, Aklan–Patay ro sangka construction worker matapos nga ginbuno it anang kaeapit-baeay bandang alas-2:00 it hapon ko adlaw it Dominggo sa Brgy. Tigayon, Kalibo.
Suno kay Ma. Salve Jean Calizo, asawa it biktima nga si Frederick Calizo, 50-anyos, residente it nasambit nga antes natabo ro insidente hay naga-eubog sigon sa sala ro anang mister kat mag-agi ro suspek nga si Leonito Legasipi Jr. ag nagpang-hangkat it inaway.
Namueaw-mueawan sigon ro biktima ag gilayon nga ginsita ro suspek apang gulpi eon lang sigon imaw kara nga gin-atake it daea nga hinangiban.
Rason para makaangkon imaw it lastro sa anang dughan nga gintunaan it anang hinali nga kamatayon.
Nadaea pa sa ospital ro biktima apang gindeklara nga Dead on Arrival.
May kaangtanan kara, ginpahayag ni Punong Barangay Gil Morandante nga insigida sanda nga nagresponde sa lugar matapos nga masayuran ro hitabo.
Apang, owa sigon imaw it nabaton nga pormal nga reklamo angot sa away it magtimbang nga parte ko mga nagtaliwan.
May may mga nabatian sigon imaw nga istorya nga may dati eon nga bagina ro daywa ag raya makaron ro ginapanan-aw nga rason sa krimen.
Ro suspek hay una eon sa kostudiya it Kalibo Municipal Police Station para sa nagakaigo nga disposisyon.
