KALIBO, Aklan—Nakaeowas ro sangka 60-anyos nga lolo matapos nga mag-eumpat halin sa ginasakyan nga barko bandang alas-6:15, dominggo it gabi-i sa kaeawran nga sakop it Brgy. Sambiray, Malay, Aklan.
Nakilaea ro biktimang si Patrocinio Flores, residente it Brgy. San Francisco, Anini-y, Antique.
Suno kay Lt. Commander Marlowe Acevedo, hepe it Philippine Coast Guard (PCG)-Aklan nga gulpi eon lang raya nga nag-eumpat halin sa barkong MV Reyna Sentenciada nga anang ginsakyan halin sa Metro Manila ag paagto sa pantalan it Brgy. Caticlan, Malay, Aklan.
Sa mayad nga swerte suno kana ag nagapadungka eon ro barko bangud nga engkaso nga sa tunga it eawod raya nag-eumpat hay posibleng missing pa raya sa makaron.
Una eon sa eowas nga kondisyon ro lolo matapos nga masalbar it nag-agi nga paraw sa lugar nga ginadaea ni Glenn Villanueva, 44-anyos it Brgy. Argao, Malay, Aklan.
Suno sa biktima nga indi imaw mapakali samtang nga nagabiyahe bangud sa pamatyagan sigon kara hay may naga-eagas kana.
Nakibot eon lang sigon ro pilang crew it barko kat gulpi raya nga nag-eumpat.
Aminado man ro biktima nga mag-eowas nga kueang sa tueog hay sangkiri eamang ro anang kinaon samtang nagabiyahe.
Matapos masalbar hay insigida raya nga gintaw-an it first aid ag gindaea sa Municipal Social Welfare and Development Office (MSWDO)-Malay.
Sa makaron hay natigayon eon raya nga mabo-oe it anang pamilya.
