Nagapati ro kapulisan nga posibleng labas-pasok ro mga responsabli sa natabu nga panakawan sa sangka baeay sa Barangay Bagto sa banwa it Lezo.
Base sa report, napan-uhan eon lang it pamilya Barretto bandang alas-8:00 it agahon it Domingo, Hunyo 16 nga owa eon ro mga importanteng gamit sa sueod it andang baeay kapareho it mga branded nga sapatos, bag, cellphone ag iba pa nga puro sigon may sentimental value sa pamilya.
Ginapatihan nga sabado it gabi-i sa kasagsagan it mabaskog nga bubu it uean hay natabu ro pagpanakaw.
Suno kay P/Lt. Zoila Tumlos Hilario, deputy chief of police it Lezo Municipal Police Station nga sa pag-usisa it imbestigador sa kaso, natukiban nga owa it sign of forcible entry nga natabu.
Makaron hay owa pa it ginatumod nga person of interest, apang base sigon sa GPS locator it gintakaw nga cellphone, ro mga suspek hay una eamang sa palibot it nasambit nga area.
Napati man ro mga awtoridad nga kabisado ukon labas-pasok ro suspek sa nasambit nga baeay.
May nakita man nga mga footprints sa sueod it baeay nga ginapatihan nga ana it teen-ager.
Sa makaron hay nagapadayun ro imbestigasyon it kapulisan sa nasambit nga insidente.
Nauna eon nga gin-post sa social media it pamilya ro natabu nga pagpanakaw sa andang baeay kadungan ro apela nga kon sin-o man ro mabaligyaan it mga gintakaw nga items hay insigidang ipaabot sa Lezo PNP ukon sa pinakamaeapit nga police station.
Nasayuran nga 11 tanan nga sapatos nga puro branded ag class A ro gintakaw, sangka maeahaeon nga bag, cellphone, 2 nga tsinelas, jersey, ag sangka RCB Shock.
Kadungan kara, nagpanawagan si Lt. Tumlos sa publiko nga maging vigilante agud nga indi mabiktima it mga kawatan eabi pa makaron nga tiempo it tag-gutom.
