KALIBO Aklan–Owa eon it kabuhi ag nagaka-agnas eon nga nasapwan sa sueod it anang kwarto ro bangkay it sangka bakasyonistang eaeaki sa Brgy. Yapak, Boracay, Malay kahapon adlaw it Sabado.
Ginkilaea ro biktima kay Scott Salcedo, 38-anyos at residente it Ridgewood Towers Ususan, Taguig City.
Suno kay Police Lieutenant Colonel Don Dicksie De Dios, hepe it Malay Municipal Police Station, Miyerkules pa owa nagareply ro biktima sa chat it anang mga abyan ag indi man raya macontact ku nagtaliwan nga mga inadlaw.
Bangud sigon kara hay ginbisitahan raya it anang mga abyan ag nangawa nga owa it may nagasabat maghalin sa sueod it kwarto matapos ro pilang pagpanawag.
Nasapwan eon lang sigon raya maeapit sa may pwertahan it anang kwarto nga nagahamyangon ag owa eon it kabuhi.
Kompleto sigon ro kagamitan it biktima ag owa it nakitang ibang mga lastro sa anang nagkaeain-eain nga parte it kaeawasan rason nga owa man it nakikitang foul play ro mga otoridad sa pagkamatay kara.
Ginpahayag dugang nga narekober man it katapo it Malay-PNP ro pilang ka mga bueong para sa highblood.
Sa makaron, nakataeana nga iga-cremate ro bangkay it biktima bangud una eon raya sa state of decomposition.
