KALIBO, Aklan–Sangka negosyante ro nagdangop sa Kalibo Municipal Police Station matapos nga ginhana nga sunugon ro anang baraka pasado ala-1:00 kaina it aga-aga sa Calachuchi road, Barangay Andagao, Kalibo.
Suno kay Stephanie Icay, tag-ana it baraka ag residente it nasambit nga lugar nga sa mayad nga swerte nga nataeupangdan it nag-agi nga pulis ro insidente, kun sa siin insigidang natapna ro kaeayo it nagresponde nga barkada it anang mister.
Sa pihak kara nga may ginatumod eon sanda nga suspek, nagapabilin nga paealigban kon ano ro motibo sa insidente bangud nga owa man sanda it kaaway sa lugar.
Base sa report, ginsindihan it suspek ro interior it kariton nga nakabitay sa kilid it baraka.
Bangud nga himo sa light materials, madali nga nagdukot ro kaeayo sa dingding kara.
Nasayuran nga antes ro hana nga pagsunog hay gintakawan man ro andang baraka ko nagtaliwan nga mga binuean.
Mabahoe ro andang pagpati nga ginahisaan ro andang negosyo sa lugar.
Sa makaron hay nagapadayun ro imbestigasyon it kalibo pnp sa insidente eakip ro pag-review sa mga CCTV footage nga maeapit sa lugar.
