Arestado ro sangka eaeaki matapos ro pagpang-eabo sa daywang ka mga persona sa Brgy. Sibalew, Banga.
Ro mga biktima hay ginkilaea kanday Jimmy Ingalla, 63-anyos ag Alvin Revira, 41-anyos, parehong residente it nasambitang lugar samtang ro ginatumod nga suspek hay ginkilaea kay Ricky Resentes, 42-anyos, residente it Brgy. Torralba, Banga.
Base sa inisyal nga imbestigasyon it Banga PNP, magkaibahan sigon nga naga-inom ro suspek ag si Revira apang matapos nga maubos ro andang unang ginbakae nga aeak hay nagpanaw ro mga raya agud mag-usoy it dugang nga ilimnon hasta nga makaabot sa baligyaan it barbeque.
May kaangtanan kara, nagkita si Revira ag anang tiyo nga si Ingalla hasta nga nagplano ro mga raya nga padayunon ro pag-inom.
Pagkatapos kara, nagdesisyon si Revira nga magbakae it ilimnon ag gin-aywanan na eamang ro anang tiyo kaibahan ro suspek.
Ginapabutyag nga gin-agbayan ni Ingalla ro suspek kung sa siin nakapa kara ro sangka sanduko nga nakabutang sa anang likod.
Matapos ro pilang minuto hay nagbalik sigon si Revira bangud sa nabatian karang kinagamo sa tunga it anang tiyo ag suspek.
Nasayuran nga nagdaeagan pa kungta si Ingalla apang natigayun nga maabot it suspek.
Ro insidente hay nagtuga it kahalitan sa siki ag tuhod ni Ingalla samtang lastro man sa tuo nga alima ro naangkon ni Revira.
Sa makarun hay nakakulong eon sa Banga Police Station si Resentes ag posibleng magapangatubang it nagakaigo nga kaso.
