Kalibo Aklan ——Patay ro sangka eaeaki matapos nga gin-baril pasado alas 6:40 kabi-i sa Sitio Saeag, Brgy. Cortes, Balete.
Nag-angkon it ap-at ka mga tama it pagbaril partikular sa ana nga kilid ag dughan nga porsyon ro biktima nga ginkilaea kay Geronimo Perez, 64-anyos, residente it nasambitang lugar matapos imaw nga gin-baril it ginatumod nga suspek nga si Edilberto Ruyo, 59-anyos, residente it Brgy. Aranas, Balete.
Base sa inisyal nga imbestigasyon it Balete PNP, naga-pahuway kabi-i ro biktima sa payag it anang unga sa nabukid nga porsyon it lugar kat gulpi eamang nag-abot ro suspek idto.
Nasayuran nga una sa idaeom it makahieilong ilimnon si Ruyo kat mag-adto raya sa payag ag armado it sangka caliber 45 nga baril kung siin raya anang ginamit sa pagpamaril sa biktima.
Hugut man nga ginpamalibaran it suspek ro alegasyon ag gin-insister kara nga idto raya sa andang panimaeay kat matabo ro insidente.
Apang, antes nabugtuan it ginhawa ro biktima hay nakasugid pa raya sa anang asawa nga si Ruyo ro nagbaril kana.
Na-recover sa lugar ro kapin sa tatlo ka mga basiwo it caliber 45 nga baril.
Ginapanan-aw makarun it mga otoridad nga ro dating alitan sa tunga it magtimbang nga parte ro posibleng rason it suspek sa pagbaril-patay kay Perez.
Sa makarun hay sa paghinakop eon man it Balete Police Station si Ruyo para sa nagakaigo nga disposisyon.
