TANGALAN, Aklan—Nagdangop sa bombo radyo si Teddy Tumbagahan, sangka residente it Brgy. Napatag, Tangalan matapos nga gina-alegar nga ginbo-oe sa listahan bilang benepisaryo kunta it Tulong Panghanapbuhay sa Ating Disadvantaged/Displaced Workers ukon TUPAD Program sa indi nana masayuran nga rason.
Suno kana pagkatapos nga mag-attend it orientation program ko nagtaliwan nga adlaw sa covered court it Brgy. Poblacion nga inabot it hasta alas-7 it gabi-i hay natukiban nana nga naduea ro anang pangaean sa listahan .
Ulihi eon sigon nag-agto sa andang baeay si kagawad anita verano kun sa siin nakapanaw eon imaw para sa orientation agud nga ipahisayod nga bukon eon imaw it kaibahan sa mga benepisyaryo sa pihak nga gintaw-an imaw it pormas ag ginpangayuan it mga requirements .
May mga saksi sigon imaw nga ana man nga mga kasimaryo nga naeakip imaw sa listahan.
Ginsaysay sigon ni kagawad verano nga gin-agtunan it andang punong barangay ro andang alkalde agud nga ipakakas imaw sa listahan.
Nagdesisyon sigon imaw nga magreklamo agud nga masayuran ro pinaka-rason bangud nga nagtuga kana it kahuy-anan ag kaeain it buot ro natabu.
Qualified sigon imaw sa TUPAD bilang sangka habal-habal driver .
Owa man imaw nagapati nga bangud sa pulitika ro pinaka-rason it tanan .
