KALIBO, Aklan–Patay ro sangka 29 anyos nga eaeaki matapos nga makapilang beses nga ginbuno it kaugalingon nga ingkampod kabi-i sa Brgy. San Isidro, Banga.
Nakilaea ro biktima nga si Michael Placido, residente it Brgy. Mercedes, Madalag samtang ro suspek hay nakilaea kay Allen Dela Cruz, 42-anyos, residente it Brgy. Linabuan Sur, Banga ag parehong tawuhan it sangka farm sa nasambit nga lugar.
Suno kay Jeosef Reloj, sambilog sa mga nag-awat sa magtimbang nga parte nga nag-inuman sanda sa Brgy. Muguing ag gusto kunta nga maghueam it motor it biktima sa andang amo apang owa raya ginpasugtan.
Sa andang pag-uli suno kana hay gin-apas sanda it suspek kung siin dikato eon natabo ro kinagamo.
Una sigon imaw nga ginsandok it siyaw it suspek sa mismong gate it panimaeay it andang amo.
Maswerte sigon nga insigida kara nga nawahing ro siyaw.
Masyado sigon nga madasig ro hitabo kung siin makapilang beses nga ginbuno it suspek ro anang igkampod sa may tiyan nga porsyon.
Dead on arrival man pag-abot sa ospital ro biktima matapos nga makaangkon it fatal nga lastro.
May kaangtanan kara, gin-insister man ni Dela Cruz nga self-defense eamang ro anang gin-ubra matapos imaw nga ginkabuligan it pagbayo it biktima kaibahan ro daywa pa kara nga barkada.
Sa bersyon it suspek, nagpanipa sigon it gate it andang amo ro biktima rason nga gin-awat nana raya.
Apang, ginkontra sigon imaw it biktima ag ginalyon nga gintueop.
Dikato eon sigon nag-umpisa ro kinagamo hasta sa nagbulig eon sanday Reloj.
Aminado man raya nga may nakasukbit imaw nga siyaw sa hawak apang owa sigon imaw it plano nga bun-on ro anang igkampod.
Nagpangayo man raya it pagpasaylo sa natabo kadugan it pag-insister nga gindepensahan eamang nana ro anang kaugalingon.
Nasayuran nga may dati eon nga owa pagka-ilintindihan ro magtimbang nga parte.
Sa makaron, nakakulong eon sa lock-up cell it Banga Municipal Police Station ro suspek para sa nagakaigo nga disposisyon.
