Kalibo Aklan ———Ginareklamo makaron it pilang ka mga pumueoyo sa Brgy. Linabuan Sur, Banga ro underconstruction nga edipisyo nga ginasugid nga ginaobrang manokan ukon poultry.
Suno sa sangka tagreklamo, ko una sigon kat nagakutana sanda sa mga naga-obra hay ginapaderan eamang ro lugar apang ko ulihi hay nasayuran nga ginahimo nga poultry.
Bangud kara, insigidang nagreklamo ro mga residente nga maeapit sa lugar bangud sa ginaeauman nga bukon it manami nga hugom ag posibleng makapaeain sa andang ikaayong eawas.
Ginpahayag dugang it tagreklamo nga mabahoe ro nasambit nga edipisyo ag sanda sigon ro eubus kara nga maapektuhan.
Samtang sa pihak nga parte, ginklaro ni Punong Brgy. Enriquez Belarmino nga ko una sigon hay nakabaton imaw it reklamo sa anang taeatapan kaangot sa pag-abo it eangaw sa lugar rason nga insigida nana nga gintaw-an it aksyon pinaagi sa pagpainspection kabulig ro sanitary inspection team it LGU-Banga sa naga-eksister nga poultry farm sa lugar nga hasta sa makaron hay ginahueat pa nanda ro report ag resulta it ginhimo nga inspection.
Sa pihak kara, ro ginasugid nga underconstruction nga poultry hay ginklaro it opisyal nga uwa it building permit ag hugot nga ginapamaeabagan it mga pumueoyo rason nga gindeny it council ro andang request.
Bangud kara, ginhinyo ni Belarmino ro mga pumueoyo nga magkooperar ag direktang magreklamo sa andang taeatapan kon may problema sa barangay.
Gin-insister kara nga uwa nagapabaya ro council ag ginhinyo man kara ro tanan nga mag-atendir it mga hinun-anon sa barangay agud nga masayuran ro mga nagakinatabo sa libot.
