KALIBO, Aklan – Nagbisita si Raige Dwayne Pronton Guarino kat unga nga nakilaea online bangud sa anang pagmemorya sa mga pluggings it Bombo Radyo Kalibo kaibahan ro anang ina nga si Roan Pronton Guarino.
Nasayuran nga pre-mature ukon miracle baby si Raige Dwayne bangud 7 months paeang raya hay gin-unga eun ngani nga imaw hay naging totally blind.
Bangud sa anang kondisyon hay gintun-an imaw ra it anang mga ginikanan nga maging independent sa tanan nga butang.
Suno kay Roan ro ina ni Raide Dwayne nga hangkat man ro mag-alaga kay Dwayne bilang raya hay nagakinahangean it special care bangud raya hay nagakinahangean it doble nga aalalay ag giya abi eun ag active ukon masami energetic si Raige Dwayne.
Apisar sa kakueangan it anang unga pagpakigbahin nana nga uwa nanda raya ginakabig nga bukon it normal.
Ginapahaom man sigon nanda ro unga sa mga mahimo magbully kana sa paeabuton paagi sa pagtao it laygay ukon giya.
Pagpakigbahin it anang ina nga bisan sanda hay nakikibot nga kaya magmemorya it pluggings ku anang unga.
Pagkumpara nana nga bisan sanda ng mga ginikanan hay indi kaya magmemorya apang ro sangka 5-anyos nga unga hay kaya.
Sa makaron nagaabot eun sa 2.8K ro views sa mga videos ni Raige Dwayne nga uploaded it anang tiya.
Aminado man imaw nga may mga kinahangeanon ro anang unga nga indi nanda kaya maitao ag ngani manami man sigon kun may makabulig kanda.
Samtang, naapresyar ag nalipay sigon sanda magbasa ag magbaton sa mga komento it mga tawo nga nawiwili ag na-iinspire it andang unga.
Dugang pa nga proud sanda sa andang unga kaibahan ro andang bilog nga pamilya.
Sa pihak nga parte, handum man ni Raige Dwayne nga maging sangka reporter ag anchorman sa anang pagbahoe.
Makaron sigon mag-euwas sa pagmemorya it mga pluggings ag advertisements sa Bombo Radyo Kalibo, imaw ra hay nagatuon sa sangka SPED class ag nagakahilig sa pagkanta.
Laygay man nana sa mga kaedaran nana nga mga unga hay magtutom eamang sa pagtuon.
Nagpakitang gilas man si Raige Dwayne sa anang mga memoryado ag paboritong pluggings, ag gintigsambilog ro mga kilaea nana nga mga anchormen ag anchorwomen, pati ro anang mga paborito kara.
