KALIBO, Aklan—Nagtao it inspirasyon sa mga pumueoyo eabi eon sa pamatan-on ro viral post it sangka grade 12 student nga tumandok it banwa it Banga samtang nagabaligya it lumpia kada nagasueod sa eskwelahan.
Suno kay Resty Requija nga owa nana ginaeauman nga mag-viral ag umani it nagkaeain-eain nga reaksyon ro anang litrato kung siin makit-an ro anang pagbaligya sa sueod it plaza.
Personal sigon nana nga desisyon nga magdaea it baligya kada may klase para may mabue-an imaw it dugang nga pambayad sa mga gaeastuson sa anang pagtuon.
Imaw sigon mismo ro naga-prepara ag naga-eaha it anang baligya kung siin alas-4:00 pa it aga-aga imaw nagabugtaw.
Maabu suno kana nga mga pamatan-on ro nagpadaea kana it mensahe matapos nga ma-inspire sa anang istorya.
Owa sigon nana ginakahuya ro anang sitwasyon sa baylo hay mas pa imaw nga nagapursigi para makabulig sa anang ginikanan.
Batyag sigon nana ro kalisod it andang pagkabutang rason nga naghimo imaw it pamaagi para indi eon magsalig ag magdugang sa paeas-anon it andang pamilya.
Plano ni Resty nga magbuoe it kursong Business Administration ukon Hotel and Restaurant Management pag-abot sa kolehiyo.
Samtang, maabu man ro nagpaabot it bulig kana matapos makita ro anang post kamana man may iba pa nga nagtanyag it trabaho.
