KALIBO, Aklan–Pabor ro sangka health expert nga boe-on eon ro Public Health Emergency sa nasyon angot sa COVID-19.
Suno kay Dr. Ian Philip Padilla, public health expert it University of the Philippines ukon UP-Visayas nga nagnaba eon ro mga nailistang kaso ag bukon eon it masyadong makataeapon ro nasambit nga sakit bangud sa mataas nga numero it mga nagbakuna.
Sa kamatuoran suno kana hay bukon eon it mandatory ro pagsuksok it face mask.
Sa pihak kara, ginpahayag ni Dr. Padilla nga ginatun-an pa ni Pangueong Ferdinand Marcos jr., ro consequences sa pagbo-oe it Public Health Emergency bangud sa posibleng pagkaduea it gahum sa Emergency Use Authorization sa mga bakuna nga posibleng magamit sa pagbakae kunta it bivalent vaccines.
Dugang pa nga indi eon magiging libre ro pagpaturok it bakuna kontra COVID.
Sa makaron hay pormal eon nga ginduea it pangueo ro Public Health Emergency sa bilog nga nasyon.
Sa pihak kara, gin padumdum ni Dr. Padilla ro tanan nga pumueuyu nga maskin nga bawi-on eon ro Public Health Emergency hay kinahangean gihapon nga magdahan ag magpaturok it bakuna.
Sa pihak nga parte, posibleng uman nga magdeklara it public health emergency engkaso nga makaangkon it mas mabaskog nga variant it COVID ag uman nga magtaas ro positivity rate
