Kalibo Aklan ——Nagreklamo sa Bombo Radyo Kalibo ro sangka padre de pamilya matapos nga owa it maskin sin-o nga miyembro it anang pamilya ro nakabaton it bulig pinansiyal sa idaeum it Social Amerlioration Program (SAP).
Suno sa tagreklamo nga si Marlon Talantor it Agbago, Ibajay nga sanda nga mag-asawa kaibahan ro andang 6 nga unga hay apektado it ginpatuman nga Enhanced Community Quarantine sa probinsiya it Aklan matapos nga maduea-an it trabaho .
Bangud kara, mabahoe ro anang pagpati nga nakasueod sanda sa sueundanan it Department of Social Welfare and Development (DSWD) apang owa nataw-an it SAP.
Gin-survey man sigon sanda it andang Barangay Kagawad nga in-charge sa andang Barangay ag gin-interview, apang owa naka-fill-up it SAP form rason nga owa nataw-an it ayuda nga ginpanupod ko sabado nga adlaw .
Maeain sigon ro anang buot bangud nga haeos tanan nana nga mga kaeapit-baeay hay nataw-an it ayuda .
Owa man sigon sanda it bagina ni Barangay Kapitan Salido ag sa kamatuoran hay sambilog imaw sa mga Barangay Tanod .
Mas deserving pa sigon imaw sa iba nga mga nakabaton it SAP sa andang Barangay.
Sa pakikipag-angot it Bombo Radyo sa DSWD Ibajay, nagpamalibad eon sanda nga mag-komento sa baylo hay gin-engganyo nanda ro tagreklamo nga magdangop sa andang opisina agud nga maklaruhan ro anang problema.
