KALIBO, Aklan—Gin-istoryahan it mga pumueoyo ko kan-o eamang ro manami nga binuhatan it sangka police officer matapos kara nga gin-uli sa Kalibo Municipal Police Station ro nakit-an nga mabahoe nga haega it kwarta ag atm nga ginapanag-iyahan it sangka Swiss national.
Suno kay PSSgt. Christian Ureta it Altavas Municipal Police Station nga halin sanda sa clinic ko Disyembre 6 kat makita nana samtang nagapanikangon sa guwa ro sangka transparent plastic envelope nga may nakasueod nga atm card ag euro bills nga naga-abot sa masobra P260,000.
Insigida sigon imaw nga nag-adto sa kaatubang nga establisyemento para usisaon kung may naging kostumer raya nga dumueo-o antes nagdiretso sa bangko ag nagpa-blotter sa Kalibo PNP.
Gintinguhaan pa sigon nana nga kontakon sa pamaagi it facebook ro Swiss national nga si Ulrich Karl Weigel apang owa raya nagasabat.
Samtang gina-print ro blotter report may gulpi sigon nga nag-abot nga magkarelasyon nga Filipina ag dumueoo nga nagapangison matapos nga maduea ro andang atm card ag kwarta.
Sa pagpangusisa it mga otoridad, nagmatch ro pagkakilaean-an it dumueoo sa ID nga ginturnover.
Eubos sigon ro pagpasamat kara kay PSSgt. Ureta bangud sa pagiging tampad kara.
Gintanyagan pa sigon imaw it kapin sa 600 euro apang owa eon nana raya ginbatuna.
