KALIBO, Aklan—Nagpatigayon it sangka public hearing sa kabilugan nga 16 nga kabarangayan it banwang Kalibo.
Raya hay para mataw-an it katumanan ro hinyu it mga tricycle drivers nga nagabyahe sa Barangay Poblacion, Kalibo.
Suno kay Johnny Damian, presidente it Federation of Kalibo Tricycle Operators and Drivers Association Inc. (FOKTODAI), nagpatawag sigon it committee meeting si Kalibo Sangguniang Bayan member Matt Aaron Guzman, chairman it committee on transportation agud nga madesisyonan kung ano ro paga-ubrahon sa mga ginsumiteng resulta it public hearing sa 16 nga kabarangayan.
Gindugang pa kara nga kun ano ro resulta hay raya eon man ro magiging basehan it panueoktan sa pamasahe.
Samtang, nakasugtanan sigon sa nasambit nga pueong it Sangguniang Bayan it Kalibo nga fix nga napueong piso ro pamasahe sa Barangay Poblacion.
Ro pagtaas it pamasahe hay nakataeana nga paga-obrahan it ordinansa it konseho sa mga masunod nga adlaw agud nga makapaguwa it special fare matrix for tricycles.
Mateuopangdan nga nag-umpisa nga magtaas ro panueoktan sa mga pampublikong saeakyan tuga it pilang restrictions nga ginapatuman partikular ro physical distancing agud nga malikawan ro posibleng pagtaeapnan it Coronavirus Disease ukon COVID-19 pandemic.
Sa makarun hay nagapabilin pa sa Modified Enhanced Community Quarantine (MGCQ) ro bilog nga probinsya it Aklan.
