Kalibo Aklan —–Ginkasubo it sangka salon owner ro anunsyo nga uman sanda nga igapasarado sa pihak nga gin down grade pa gid sa Modified General Community Quarantine ro bilog nga probinsya it Aklan.
Suno kay Asia Adriana Ybarra, uwa imaw nagakontra sa mando it gobyerno apang ginaayo kara nga mabuligan sanda it gobyerno partikular ro ana nga mga empleyado.
Raya hay matapos nga nagsarado sanda it haeos daywang buean kon sa siin uwa sanda it kita ag no work, no pay man ro ana nga mga staff.
Maabo pa sigon ro andang ginabayran nga bills ag uwa man sanda it bastante nga kita para mapun-an ro mga binuean nga nakasarado sanda.
Suno kana, ginaeauman nanda nga magatayuyon eon ro andang trabaho bangud nga ko Mayo 1 hay gin-anunsyo nga pwede eon sanda magbukas rason nga ginkalipay nanda raya bangud nga uwa man imaw it bastante nga kwarta nga maayudahan ro anang mga staff kaparehas it Social Amelioration Program (SAP) it gobyerno kamana man uwa man sanda na-approved sa COVID-19 Adjustment Measures Program (CAMP) it Department of Labor and Employment (DOLE).
