Kalibo Aklan——-Nagpangayo it public apology ro seafarer nga si Marlex Flores it banwa it Lezo kay Municipal Health Officer Dr. Athena Magdamit .
Raya hay matapos nga padaehan kara it mga bukon it manami nga mga tinaga pinaagi sa text message ro doktora kat owa ginpasugtan ro anang hinyu nga magguwa eon it quarantine facility maskin nga owa pa natapos ro anang 14 diyas nga quarantine period.
Suno kay Flores nga nauna eon imaw nga nagpangayo it pasaylo sa andang pag-atubang sa Barangay apang medyu bukon it bastante ag owa ginbaton ni Dr. Magdamit ag ko iba pang staff kara.
Aminado man ro seafarer sa anang naging saea ag haum sigon imaw nga magpaubos .
Ginpamilit pa kara nga medyu nagkaangkon eamang it miscommunication sa tunga nanda it doktora.
Nauna eon nga ginhinyu ni Flores nga maka-uli eon ko Hunyo 26, biyernes nga adlaw bangud nga inoras eon lang sigon ro ginahueat ag matapos eon ro anang daywang domingo nga quarantine procedure ko Hunyo 27.
Apang raya hay natiempo nga Sabado ag owa sigon it releasing sa raya nga adlaw rason nga gin-schedule it Hunyo 28 rason nga nagtaas ro presyon it anang dugo ag nakahambae it mga maeain nga tinaga.
Gindugang pa kara nga nag-abot sanda sa Aklan ko Hunyo 13 it alas-3:30 it aga-aga matapos nga magguwa ro resulta it anang swab test ko hunyo 12 , kun sa siin, nag-negatibo imaw sa coronavirus disease (COVID-19) .
Nagamadali sigon imaw nga makaguwa sa hotel nga gintaeana nga ligtas COVID center it LGU-lezo bangud nga mag-eowas nga ginahidlaw sa anang pamilya hay gina-pressure man imaw it andang kompaniya angot sa mga dokumento nga kinahangean nga isumite para sa uman nga pagsakay sa barko nga sangka cargo ship.
Mag-eowas kay Dr. magdamit hay nagpagayo man imaw it pasaylo kay Lezo Mayor Mary Lynette Fernandez ag iba pang staff it MHO-lezo.
Samtang, sa pakikipag-angot it Bombo Kalibo kay Dr. Magdamit, nagpamalibad raya nga magkomento ag sa baylo hay gin-insister nga sa tamang venue eon lang sanda magakita .
