Haom ag hugot nga ginapanindugan it sangka nanay nga ipaidaeom sa sangka DNA test ro ginaturo kara nga sangka SK chairman nga tatay it anang baby girl nga onga.
Raya hay matapos nga naunang ginpamalibaran it eaeaki nga imaw ro responsable sa pagnabdus kara.
Emosyonal nga nagdangop sa Bombo Radyo Kalibo si Lovely Zaulda, residente it Libacao,Aklan matapos nga owa gid nagpabatyag kana ro tatay it anang baby girl hasta nga nakaonga imaw.
Desidido sigon imaw nga ipadaeom sa DNA test ro onga ag si Jerome “Jm”Yabut ag sangka SK Chairman it Brgy. Luctoga sa banwa it Libacao para mapamatud-an nga imaw ro tatay it anang ginbun-ag.
Antes sigon imaw nga makaonga hay nakaangkon ro magtimbang nga parte sa tunga it andang Punong Barangay it kasugtanan nga magapakita si Yabut kay Zaulda kun imaw hay makaonga eon para sa mga legal nga dokumento it onga.
Apang ginapabutyag nga sa baylo sigon nga magpakita hay nagpanago eon sigon raya ag indi eon macontact.
Ginapahayag dugang nga raya ro nagtueod kana para pasakaan si Yabut it kaso ag iparecord ro hitabo sa Libacao PNP.
Sa kamatuoran sigon hay owa man gina-eagas ni Zaulda si Yabut para panindugan imaw ukon maging asawa apang gina-insister eamang kara ro pagsustento sa onga.
Sa pihak nga parte, gina-alegar nga mag-eowas kay Zaulda hay may sambilog pa gid nga babaye nga natigayon nga manabdusan ni Yabut.
Panawagan man ni Zaulda kay Yabut nga maging responsable eon lang raya ag maging minatuod nga eaeaki sa baylo nga magpinanago agud nga matapos eon ro nasambit nga isyu
