MAKATO, Aklan — Kalbaryo eon sa pilang mga residente sa sangka lugar sa Barangay Tugas, Makato ro pagkalhit it sangkaterbang eangaw.
Suno kay Mrs. Belinda Fuentes, sambilog sa mga residente nga adlaw-adlaw nanda nga sakit it ueo ro mga eangaw.
Sa kamatuoran suno kana nga mag-eowas sa mga nakaplastar nga fly trap sa sueod it andang baeay ag sa andang bakery hay pirme man imaw nga may bitbit nga pangsampok it eangaw agud nga maprotektahan ro anang eapsag nga unga.
Bukon eamang suno kana ro andang mga pagkaon ro apektado kundi pati ro andang negosyo nga bakery.
Sa pihak nga parte, ginpahayag ni Mrs. Marivic Ongsuco nga ko nagtaliwan nga dag-on pa nanda ginareklamo ro pagkalhit it mga eangaw sa andang lugar .
Masyado sigon sanda nga apektado bangud nga haeos maeapit sa andang baeay ro sangka manukan nga ginaturo nga ginahalinan it sangkaterbang eangaw.
May mga kahigayunan suno kana nga nagakaduea ro eangaw apang kon uman nga umatake hay sobra man kaabu.
Nagakabaeaka sigon imaw nga maapektuhan man ro anang negosyo nga bake and pastries.
Apela it mga apektadong residente sa andang barangay council nga kabay nga mataw-an it nagakaigo nga aksyon ro andang problema.
Ginpaabot man nanda ro concern sa tag-ana it manukan nga nagpromisa sigon nga maga-obra it nagakaigo nga waste disposal ukon septic tank kapin makaron nga nakaangkon it expansion ro anang poultry farm.
Mag-eowas sa barangay council plano man nanda nga ipaabot ro reklamo sa Municipal Health Office ag iba pang natungdan nga ahensiya it gobyerno.
Angot kara, gin engganyo ni punong barangay Dionito Tabernilla ro mga tagreklamo nga magdangop sa andang taeatapan agud nga maipaabot ro andang reklamo sa natungdan ag indi eamang ipaagi sa social media.
Kaabuan sigon sa mga manukan sa andang barangay hay puro mga maisot eamang ag pilang manok eamang ro gina-alagaan.
