KALIBO, Aklan—Ginapahueag it sangguniang bayan it Kalibo ro municipal agriculture office sa pagpanaeasa it peste nga ueod nga fall armyworm sa mga kamaisan.
Suno kay SB member Ketchie Luces nga haeos 50 porsiyento it mga tanum nga mais sa banwa it Kalibo hay apektado it peste partikular sa Brgy. Mobo, Tigayon, Tinigao, Linabuan Norte ag iba pa.
Nagakabaeaka sigon ro pilang mga mangunguma bangud sa pagkalugi nga naangkon.
Nagapanawagan ro mga mangunguma sa regional office it Department of Agriculture nga mataw-an it atensyon ro andang problema pinaagi sa mga programa para sa libreng pautang, mga farm inputs kapareho it libreng seedlings ag pesticide ukon pagpatuman it pest control management.
Ginakabaeak-an pa makaron nga magasaylo ro mga peste sa mga tanum nga paeay.
Naga-atake ro nasambit nga peste sa mga pananum nga mais ag unang-una kara nga ginakaon ro pinaka-tunga ag mga naga-ugbos nga batang dahon.
Apang kon may bunga eon ro mais hay ginakaon man it mga raya ro bunga it mais.
