KALIBO, Aklan— Kadungan sa pagbukas it Boracay sa Oktubre 26, adlaw-adlaw eon nga makaangkon it domestic ag international flight sa Kalibo International Airport.
Nakabaehag sa ginpaguwa nga flights schedule it Civil Aviation Authority of the Philippines (CAAP)-Aklan, umpisa sa Oktubre 26 hay makaangkon it direct flights sa paeuparan halin sa Incheon ag Busan, South Korea, kamana man ro Shanghai, Peking, Shenshen ag iba pang destinasyon halin sa China ag sa Taipei, Taiwan.
Ro nasambit nga mga flights it nagkaeain-eain nga airline companies hay hasta sa buean it Marso 2019.
Nasayuran nga umpisa nga ginpasarado ro Boracay ko Abril 26 para sa an-um nga buean nga rehabilitasyon, pilang nagapangunang local airline companies ro nag-anunsyo it flight cancellations paagto ag paguwa it Caticlan ag Kalibo airport.
