KALIBO, Aklan — Pwedeng magdesisyon ro mga school heads kun kinahangean nga suspendihon ro face-to-face classes sa andang natungdan nga mga eskwelahan bangud sa grabeng it init it tiempo.
Raya ro ginpahayag ni Mar Bien Gregory Parel , division information officer it Department of Education (DepEd Aklan).
Suno kana nga may ginasunod sanda nga polisiya sa class suspension sa mga public schools sa bilog nga nasyon bangud sa nasambit nga weather condition .
Madumduman nga pilang lugar sa nasyon ro nagsuspinde it face-to-face classes agud nga protektahan ro mga estudyante, manugturo, ag iba pang staff kasunod it pagtaas it heat index .
Kaibahan pa sigon sa pro active measures ukon preparasyon it kada eskwelahan hay ro pagsiguro nga makaangkon it bastante nga tubi nga mainom ro mga estudyante, pagsiguro nga may nagakaigo nga bentilasyon ro mga classroom ag ro pagkansela anay sa mga outdoor activities.
