Temporaryong ginsuspinde it Philippine Coast Guard ukon PCG Caticlan ro mga sea sports activities sa beachfront it isla it Boracay.
Suno kay Coast Guard Senior Chief Petty Officer Dominador C. Salvino, ro nasambit nga tikang it andang taeatapan hay kasunod sa pagpanaeasa it Southwest monsoon ukon Habagat season nga peligroso para sa mga turista nga nagahimo it mga nagkaeain-eain nga aktibidad sa dagat.
Bangud kara, insigida sanda nga nakipag-angot sa Boracay watersports association ag sa lokal nga gobyerno it Malay agud nga maimpormahan ro mga raya nga isaylo eon lang sa Bolabog area ukon sa back beach ro mga aktibidad kaparehas it parasailing, kite boarding ag maabong iba pa.
Ginpahayag dugang ni Salvino nga regular eon nanda raya nga ginahimo partikular kon umabot ro makarundaya nga tyempo.
Nasayuran nga maskin sigidas ro pag-inuean ko mga nagtaliwan nga adlaw hay uwa gihapon naapektuhan ro tourist arrival sa isla nga naga-average it 8,000 kada adlaw kaibahan eon ro mga dumueoong turista halin sa mga kaeapit nga nasyon it Pilipinas
