KALIBO, Aklan—Kapin sa 800 ka mga pasahero nga ginakaeakipan it mga turista ag crew members ro daea it Seabourn Sojourn cruise ship kat nagbisita raya sa isla it Boracay ko adlaw it dominggo.
Ro foreign cruise ship hay naghalin sa Auckland, New Zealand ko February 10 kon sa siin nakaadto eon raya sa Australia, Timor-Leste, Indonesia ag Palawan antes nga nag-eayag paadto sa Boracay.
Haeos katunga sa mga bisita hay nagpanaog sa cruise ship ag naglibot sa tanyag nga isla kon sa siin ginsug-aeaw ro mga raya it ati-atihan tribe kaibahan ro mga staff it Malay Tourism Office ag maging ro opisyal it lokal nga gobyerno it Malay.
Kaparehas sa nakaangdan, may mapig-od nga programa nga ginpatigayon bilang pagkilaea sa andang pagbisita.
Nauna eon nga ginpahayag ni Mr. Nieven Maquirang, officer-in-charge of the Port Cruise Ship Operation and Special Project nga ro pagbisita it mga cruise ship sa isla it Boracay sa pagsueod it dag-on 2024 hay resulta it pagtinguha it lokal nga gobyerno it Malay, stakeholders ag iba pang natungdan nga ahensya it gobyerno nga ma-showcase ro Boracay bilang sambilog sa mga nagapangunang destinasyon it mga nagaeayag nga cruise ship.
Madumduman nga ko ulihing dominggo it buean it Pebrero hay nagbisita ro MV Norwegian Jewel sakay ro kapin sa 2,700 ka mga pasahero.
Ginsundan it MV Westerdam nga kapin sa 1,900 nga mga pasahero man ro daea.
Sakay it daywang ka cruise ship ro mga European, American ag Asian tourist kon sa siin nakitaan ro mga raya it manami nga expression sa andang pag-abot sa Boracay.
