KALIBO, Aklan – – – Gina-usoy sa gihapon it Philippine Coast Guard (PCG) ro sambilog sa mga mangingisda nga naduea matapos nga aywanan it anang mga kaibahan sa andang ginasakyan nga baruto sa isla it Boracay.
Suno kay Chief Master Dominador Salbino it PCG Aklan, padayun ro andang pag-usoy kay Jhon May Zamora, 24 anyos, sangka security guard ag tubong Bago City, Negros Occidental, apang temporaryong naga-istar sa Sitio Cabanbanan, Brgy. Manocmanoc.
Nagsaeampitan sigon sanday Zamora ag ro iba pa kara nga mga kaibahan nga magpanakop it isda sa Sitio Bolabog, Brgy. Balabag ku it martes it hapon.
Nasayuran nga ginhueam eamang nanda ro ginsakyang baruto nga may pangaean nga MBCA Norejane nga ginapanag-iyahan ni Norvel Cawaling it Sitio Tambisaan, Manocmanoc agod nga magpatigayon it pagpangisda.
Pag-abot sigon sa may kapin sa 200 meters ku dagat it Sitio Bolabog hay nag-europ eon ro mga kaibahan ni Zamora ag naaywan raya sa nasambit nga baruto.
Apang ginasugid nga sa andang pagbutwa hay owa eon ro baruto kamana man si Zamora rason nga nag-eangoy eon lang sanda pabalik sa binit it dagat.
Ginapahayag man ni Salbino nga nakit-an kahapon it agahon rong baruto nga ginsakyan it napueo ka mga kaeaeakin-an sa Brgy. Mabini, San Fernando, Romblon apang owa eon si Zamora.
Sa makaron hay nagapadayun pa sigon ro andang ginapatigayon nga pag-usoy kay Zamora.
