KALIBO, Aklan — Sa gintingob nga pwersa it lokal nga gobyerno it Kalibo, Kalibo Municipal Police Station, Philippine Coast Guard, barangay council, natungdan nga ahensiya it gobyerno ag iba pang grupo, kasado eon ro seguridad sa Barangay Pook, Kalibo bilang pagpahaum sa kapistahan ni San Juan de Bautista sa Hunyo 24.
Suno kay Punong Barangay Lodi Pinos it nasambit nga lugar nga nagpueong eon ro mga ahensya it gobyerno kaibahan ro MDRRMO ag nagkaeain-eain nga organisasyon agud nga masiguro ro andang kahauman para sa kaeowasan ag kaayusan it publiko partikular ro mga nagapaligos sa baybayon ag mga resorts nga may mga swimming pool.
Kasado eon man ro mga estratehiya para sa traffic management, emergency response, ag iba pang kinahangeanon nga tikang agud nga mapabilin ro eowas ag maayos nga daeagan it mga aktibidad sa adlaw it selebrasyon.
Kaibahan man sa mga ginatutukan it mga awtoridad ro posibleng pagbug-at it daeagan it trapiko pasueod sa jetty port eabi pa ag ginaeauman ro pagdagsa it mga naga-excursion.
Sa pihak nga parte, ginpasiguro ni Kapitan Pinos nga magapatigayon it day ag night roving patrol ro anang mga barangay tanod eabi pa ag nagkaeain-eain nga mga events ro pagahiwaton sa Pook jetty port it LGU-Kalibo.
Hugut sigon makaron ro andang pagbantay sa nasambit nga lugar eabi eon ro pagpatuman it ordinansa angot sa curfew hours umpisa alas 10 it gabi-i hasta alas 4 it aga-aga .
Raya hay agud nga malikawan ro mga kinagamo ukon rambol nga ginaeakutan it mga pamatan-on.
Pilang kutsilyo ro andang narekober halin sa mga menor de edad nga nagawinarang sa dis-oras it gabi-i kamana man nga may natukiban sanda nga bag-ong grupo ukon gang it mga pamatan-on nga imaw ro andang gina-monitor makaron.
