KALIBO, AKLAN — Naka-alerto ro mga soldado sa isla it Boracay ag bug-os nga probinsya it Aklan agud malikawan nga makaabot ro kinagamo nga nagakatabo makaron sa Marawi City it Maute group.
Ginpahayag ni Lt. Col. Leomar Jose Doctolero, commander it 12th Infantry Batallion nga uwa sanda it ginpadaeang soldado sa Marawi sa pagtugis sa teroristang grupo, apang ginpaidaeom sa alert status ro andang tropa.
Hugot sigon nga pagbantay ro ginapatigayon makaron sa Boracay kaibahan ro kapulisan ag mga stakeholders agud masiguro ro kaeowasan it mga turista ag mga residente.
Ginpahayag dugang nga sa kamatuoran hay nakipag-angot sanda sa Muslim community ag padayon ro monitoring sa sitwasyon sa Mindanao.
Mag-eowas dikara, ginabantayan eon man ro mga paeoparan ag pantalan sa Aklan kontra sa posibleng pag-atake ag paeag it terorista.
Madumduman nga bangud sa bakbakan sa tunga ko tropa it gobyerno ag teroristang grupo ko Mayo 23 hay nagdeklara it martial law sa sueod it 60-diyas si Pangueong Rodrigo Duterte.
