KALIBO, Aklan — Namatay samtang ginabueong sa ospital ro sangka security guard nga nagabisikleta matapos nga masunggaban it pampasaherong van, bandang alas-7:00 it agahon it Domingo, Enero 5 sa national highway nga sakop it Brgy. Laguinbanwa East, Numancia.
Sa inisyal nga imbestigasyon it Numancia Municipal Police Station, nakaangkon it patal nga lastro sa nagkaeain-eain nga parte it eawas ro 51-anyos nga biktima ag residente it Brgy. Linabuan Sur, Kalibo samtang ro pampasaherong van hay ginamaneho it 45-anyos nga eaeaki ag residente it Brgy. Poblacion, Tangalan.
Ginapahayag nga madanlog ro karsadahon sa nasambit nga lugar it nasambit nga pang-orason kon sa siin naduea-an it kontrol ro driver hatsa nga tumiyog it makapilang beses ro saeakyan ag natigayon nga nasunggaban ro biktima.
Bangud sa anang pagkatumba, naduea-an eagi raya it alintro ag insigida man nga gindaea it mga nagrespondeng miyembro it Municipal Disaster Risk Reduction Management Council sa ospital para sa nagakaigong medikasyon.
Apang, makataliwan ro pilang oras hay binawian man raya it hueam nga kinabuhi bangud sa anang naangkon nga mga lastro.
Ro van driver hay presenteng una sa kostudiya it pulisya ag posibleng magapangatubang sa nagakaigong kaso.
