NUMANCIA, Aklan—Ginpaathag ni Gabriel Taratanto, secretary it Muslim Foundation it Muslim Community sa Numancia nga maskin hin-aga pa ro holiday sa bilog nga Pilipinas, apang makaron ro umpisa it andang selebrasyon it Eid’l Fitr.
Suno kana nga nagtapos eon ro sang buean nga pagpu-asa it mga Muslim.
Ro mga lider it Muslim ro nagatumod it petsa it Eid’l Fitr sa tiempo it tradisyonal nga seremonya sa pagtan-aw sa buean, sa ika-29 diyas it Ramadan.
Ro pagtan-aw it bag-ong buean ukon moon sighting hay nagakahueugan nga ro masunod nga adlaw hay ro Eid ukon kapistahan.
Kon indi makita ro buean, ro mga Muslim hay magapuasa pa it sang adlaw agud matapos ro 30 diyas nga pagpuasa.
Ro pag-anunsyo it petsa para sa Eid’l Fitr makaron nga dag-on hay natabu pagkatapos nga ro crescent moon hay nakita it pilang mga grupo nga gin-organisa it Bangsamoro Government, PAGASA, ag iba pa, ag ginkumpirma it mga awtoridad eakip ro Bangsamoro Grand Mufti Sheikh Abdulrauf Guialani.
Dugang pa ni Taratanto nga ro Eid’l Fitr hay sambilog sa importante nga religious event sa islam nga kun sa siin bilang kaparte it andang selebrasyon, nagatau ag nagapanupod it pagkaon sa mga pobre nga kaeapitbaeay, mga igbata, ag amigo.
Nagahaead man it pangamuyo para sa kalinong ag pagkaeasugot it mga pumueuyu.
Ag kapareho it Paskwa it mga Katoliko, ro mga unga nga Muslim hay nakakabaton it regalo halin sa andang natungdan nga mga ginikanan ag igbata.
Ro pagtau it regalo hay kaparte it andang pagdayaw kay ALLAH, ukon ro tawag sa Diyos nanda nga mga Muslim, sa tanan nga mga grasya nga andang nabaton.
