KALIBO, Aklan—Nagdihon it proposisyon si Senate Minority Leader Franklin Drilon sa pagbilog it Boracay Development Authority nga imaw ro magadumaea ag maga-develop sa sikat nga isla it boracay.
Sa idaeum it Senate Bill No. 17, ro Boracay Development Authority nga maga-operate, maga-administer, magadumaea ag maga-develop sa isla.
Ro nasambit nga grupo hay makaangkon it 15 nga miyembro sa andang board of directors nga ginaeakipan it representante halin sa probinsiya it aklan, munisipyo it Malay, ag tatlong barangay sa isla.
Makaangkon man sigon it ap-at nga representante halin sa national government, tatlo halin sa business and investment sectors, ag tatlo halin sa local community organizations ukon non-government organizations.
Suno kay drilon nga ro pag-apruba ni President Rodrigo Duterte sa P25-billion pesos nga Boracay Medium-Term Action Plan hay may mabahoe nga importansiya agud nga uman nga maibalik ro dating kaanyag it Boracay nga ginbansagan nga most beautiful island in Asia.
Ro ginaproponer nga Boracay Development Authority hay pwede nga maghimo ag magpatuman it short and long-term plans, mag-isyu it permits, magmandu it pagpasarado ukon suspension it development ukon construction, ukon pagtapos sa anuman nga operasyon nga makasamad sa isla.
Pwede man suno kana nga makaangkon ro Boracay Development Authority it professional manager bilang administrator ukon general manager nga iga-appoint it presidente.
Gindugang pa ni drilon nga ro Boracay hay sangka national treasure rason nga kinahangean nga maprotektahan.
