KALIBO, Aklan—Napahanga si Senator Imee Marcos sa nakit-ang mabahoe nga pagbag-o sa isla it Boracay ag maging sa bulto it mga turista nga nagabisita sa sikat nga isla.
Sa interview it Bombo Radyo Kalibo, napa-wow ro senadora sa uman nga pag-umwad ag pagpagsik it industriya it turismo bangud nga inde sigon magkamayaw ro mga bakasyunista kon sa siin, dueotdutan ro mga raya sa paeoparan nga maskin imaw hay sangkiri eon lang uwa nadayon sa Boracay bangud sa punuan it pasahero ro mga eroplano.
Ginakabig it magueang ni Pangueong Ferdinand Marcos Jr. nga manaming senyales ro haeos punuan nga mga accommodation establishments sa Boracay nga uman raya nga nakabawi halin kat ginpasarado ni dating Pangueong Rodrigo Duterte ko 2018 para sa rehabilitation ag nasundan pa it pandemya daea it coronavirus 2019.
Sa pihak kara, nagakabaeaka ro senadora sa anang nataeopangdan halin ko 2021 kat huli nana nga pagbisita sa isla nga masyadong nag-eapad ro baybayon ag kinaon eon kara it husto ro mga baeas.
Angot kara, gusto nana nga istudyuhan kabulig ro mga natungdan ro pilang ka mga tikang nga dapat himuon agud nga inde eon eubusan nga kan-on it eawod ag maduea ro famous long white beach.
Si Senator Imee Marcos hay sambilog sa mga bisita sa ginpatigayon nga Philippine Councilor’s League 1st Quarterly Legislative Educaton Program sa Boracay.
