KALIBO, Aklan — Ginkumpara it sangka political analyst sa Aklan sa paboritong iced dessert it mga Pinoy nga halo-halo ro senatorial line-up it administrasyong Marcos.
Natabu ro pagpakilaea pilang adlaw antes ro pagdihon it certificate of candidacy (COC) it mga magapa-ilihir sa maabot nga 2025 midterm election.
Suno kay Atty. Harry Sucgang nga normal sa daeagan it pamulitika sa Pilipinas nga kon sin-o ro sa poder hay maabu ro naga-apin.
Kon tan-awon suno kana, ro ginpaguwa nga 12-man line-up nga ginpakilaea ni Pangueong Ferdinand Marcos Jr., sa sangka event it “Alyansa Para sa Bagong Pilipinas” hay ginaeakipan it mga re-electionist ag returnees ukon nagabalik sa pulitika nga naghalin sa limang political parties kun sa siin pila sa mga raya hay naging kritiko pa it anang administrasyon.
Pila sigon sa listahan hay ro dating kandidato sa pagkapangueo ko 2022.
Nasayuran nga ro mga magapadaeagan para sa re-election hay sanday incumbent Sen. Pia Cayetano, Sen. Bong Revilla, Sen. Lito Lapid, Sen. Francis Tolentino ag igmanghud kara nga si Sen. Imee Marcos nga owa nakatambong sa pagtililipon.
Halin man sa House of Representatives, magapa-ilihir sa senatorial spot sanday Las Pinas City Rep. Camille Villar ag ACT-CIS Partylist Rep. Erwin Tulfo.
Samtang, uman nga magahana sa andang natungdan nga senate-comeback sanday former Senator Manny Pacquiao, former Senator Ping Lacson, ag former Senate President Tito Sotto.
Nagahandum man it unang termino sa senado sanday Makati mayor Abby Binay ag DILG chief Benhur Abalos III.
Sa pihak nga parte, bangud nga suod nga mag amigo sanday Aklan 2nd district Cong. Ted Haresco ag House Speaker Martin Romualdez , indi pa masayuran suno kay Atty. Sucgang kon anyong grupo sa tunga ni Haresco ag Miraflores ro pagasuportahan it house speaker.
