KALIBO, Aklan — Natumod eon it miyembro it theft and robbery section it Kalibo Police Station ro mga responsable sa panakawan nga nag-eontad sa Brgy. Andagao, Concepcion Street ag sa Capitol Subdivision iya sa banwa it Kalibo.
Suno kay Police Staff Sgt. Erick John De Lemos it Kalibo PNP, daywang ka grupo it mga menor de edad nga ginakabig nandang Children In Conflict with the Law ukon CICL ro responsable sa serye it paeanakawan.
Ginpahayag dugang nga uwa naga-eayo ro modus it daywang ka grupo kon siin target nanda kara ro mga baeay nga uwa it tawo ag sigurado nga may mabueo sandang gamit kaparehas it cellphone ag kwarta.
Mag-eowas kara, uwa man nanda ginapaeampas ro kahigayunan nga magbukas it refrigerator agud nga makabueo it pagkaon.
Pauman-uman suno kana ro nagakatabo sa andang mga nadakpan nga mga suspek kon siin bangud sa menor de edad ro mga raya hay inde man nanda makasuhan rason nga ginaturn-over sa Department of Social Welfare and Development (DSWD) matapos imbestigahan ag ibalik man rayon it ahensya sa andang mga ginikanan.
Nakikitang rason it pulisya kon ham-an it nagapanakaw ro mga onga hay ro iresponsableng pagpabahoe it mga ginikanan, barkada ag ro andang bisyo sa pagkalulong sa computer games.
Samtang, ginlaygayan man kara ro mga ginikanan nga bantayan ro andang mga onga ag tur-an it eksakto agud nga inde maeakot sa mga panakawan ag iba pang krimen.
