KALIBO, Aklan — Ginapatihan nga posibleng short circuit ro rason it pagkaeayo it poste sa Brgy. Tambak, New Washington bandang alas-9:30 it gabi-i it Domingo, Disyembre 29, 2024.
Suno kay FO3 Enrico Nam-ay Jr., it Bureau of Fire Protection (BFP)- New Washington nga base sa andang imbestigasyon, posibleng nasudlan it tubi ro mga electricity connections rason nga nakaangkon it short circuit ag naging rason it pagkaeayo it kontador .
Haeos ap-at nga kontador ro nasunog kaibahan ro ginakabitan kara nga poste.
Bangud kara, naduea-an it supply it kuryente ro pilang panimaeay sa nasambit nga lugar ag owa man it napabalita nga naninahan sa insidente.
Samtang, uman nga nagpadumdum ro opisyal nga ugalion nga i-check ro mga wiring ag electrical outlet agud nga malikawan ro pag-angkon it sunog.
Mag-eowas sa BFP, ro insidente hay ginrespondehan man it Aklan Electric Cooperative (Akelco).
Sa pihak nga parte, maskin nga bawae ro magbaligya it paeupok sa andang banwa sandig sa naga eksister nga ordinansa, pwede gihapon sanda nga maggamit it mga firecrackers ag pyrotechniques rason nga dapat gihapon ro dobleng pagdahan .
