Kalibo Aklan ——-Gin-engganyo ni Fr. Jude Rebaldo, kura paroko it St. Joseph Spouse of the Blessed Virgin Mary Church sa banwa it Banga ro gobyerno nga pasugtan eon ro mga pagsimba sa mga lugar nga sa idaeum it General Community Quarantine kapareho it Aklan bangud nga raya hay “essential” agud nga pabaskugon ro mental, psychological ag spiritual resilience it mga pumueuyu ag madali nga makabangon ro mga raya halin sa epekto it coronavirus disease (COVID-19) pandemic.
Ro masubo suno kana sa guidelines hay ginapasugtan eon nga magbukas ro mga restaurants , salon ag iba pa , apang ro simbahan hay bawae pa.
Ginpamilit ni Fr. Jude nga magasunod sanda sa mandu it inter-agency task force, apang indi pwede nga indi sanda makapatigayon it misa bangud nga adlaw adlaw nanda raya nga hilimuon.
Kinahangean eamang suno kana nga sangkiri ro tawo nga magatambong sa misa .
Ginapaiway anay sigon makaron ro kasae, samtang ro bunyag hay ginapasugtan basta nga raya hay pagatambungan eamang it mga ginikanan it unga ag sangka ninong ag ninang .
Tuyo kara nga hugut nga mapatuman ro physical distancing sa kapareho nga mga religious services .
Sa guidelines it simbahang Katolika sa gobyerno, mas maabung misa ro pagahimuon agud nga malikawan ro pagtumpok-tumpok it mga deboto.
Samtang ro mga magueang hay gina-abisuhan nga magpamati sa misa online.
