KALIBO, Aklan — Bukon it pabor ro Simbahang Katolika sa gambling rason nga andang ginkalipay ro pagpasarado ni Pangueong Rodrigo Duterte sa gaming operations it Philippine Charity Sweepstakes Office (PCSO) sa bilog nga nasyon.
Suno kay Fr. Tudd Belandres it St. John the Baptist Cathedral, indi dapat magsalig ro mga pumueuyo sa “game of chance” kundi ro andang saligan hay ro andang kaugalingon nga hugod ag ro pagtinguha nga mabuhi ro andang pamilya pinaagi sa legal nga trabaho.
Ginpahayag dugang nga andang ginkasadya ro pagpasarado sa mga gaming schemes kaparehas it Keno, Peryahan ng Bayan, Small Town Lottery (stl) ag iba pa.
Ginpaathag nga kat ginduea ro suspension sa tanan nga lotto outlet hay may tyansa eon man ro mga pumueoyo nga magpaswerte hasta sa umabot sa punto nga pati ro andang inugkaon hay itaya pa.
Suno kana, nagakadapat nga indi pagtur-an ro mga pumueuyo nga magpaswerte kaparehas sa lotto bangud nga raya uwa it ginatawag nga “fairness”.
Owa suno kana nagakalipat ro simbahan sa paglaygay sa publiko nga naga-engaged sa sugae bangud nga uwa it mayad nga bwas-damlag nga maitao raya sa tawo.
