KALIBO, Aklan—Ginpasakupan it maabu nga mga deboto ni Sr. Sto. Niño de Kalibo ro ginpatigayun nga caravan it St. John the Baptist Cathedral para iselebrar ro kapiestahan.
Ginsakay sa mga pribadong saeakyan ro mga bandang nagapatik kaibahan ro nagkaeain-eain nga imahe ni Sr. Sto Niño.
Makita man sa caravan ro magarbong preparasyon it mga nagpasakop bangud sa bongga nga mga puni sa andang saeakyan.
Naging masako man ro mga katapo it Kalibo Municipal Police Station ag iba pang law enforcement agency sa pagbantay agud nga maipatuman ro public health protocols partikular ro physical distancing.
Maskin nga owa ro nakaugalian nga merry making ukon sadsad sa mga nagapangunang karsadahon sa Kalibo, gin-abangan gihapon it mga pumueoyo ro ginhiwat nga grand parade nga nag-umpisa it alas-3:00 kaina it hapon.
Angot kara, gindagsa man it ginatos nga mga manugsilimba ro ginpatigayun nga Pilgrims Mass pasado alas-7:00 kaina it agahon.
Matueopangdan nga nagbutang it mga physical distancing marker sa saeog ro pamunuan it simbahan kung siin pwedeng magtindog ro mga gustong magsimba sa guwa it simbahan hasta sa sueod it Kalibo Pastrana park.
Raya hay bangud limitado eamang sa 250 hasta 300 katawo ro ginapasugtan nga makasueod sa simbahan.
