KALIBO, Aklan—Uman nga magapatigayon it simulation exercises makaron nga adlaw ro Civil Aviation Authority of the Philippines ukon CAAP sa Kalibo International Airport.
Suno kay CAAP Aklan general manager Engr. Eusebio Monserate Jr., raya eon ro ikaywang kahigayunan nga magapatigayon it realistic drill sa paeoparan para mapahauman pa it husto ro nagahilapit nga pagbalik operasyon it paeoparan sa mga commercial flights.
Maga-umpisa alas-8:30 it agahon ro first phase it simulation drill nga magasentro sa departure it mga pasahero nga paga-umpisahan sa pagsueod nanda sa compound it paeoparan kon sa siin pagapasakupan raya it mga tawuhan nga may kaangtanan sa operasyon.
Samtang, ro second phase hay magasentro man sa arrival it mga pasahero nga pagapasakupan it maximum passenger it sangka aircraft.
Ginpahayag dugang ni Monserate nga dikara nanda makit-an kon anu pa ro dapat nga pagatutukan sa new normal operation sa paeoparan.
Samtang sa pihak nga parte, uman nga ginklaro ni Monserate nga uwa pa it approval ro inter agency task force on emerging infectious disease ukon IATF-EID kon san-o pormal nga magabalik ro byahe sa KIA.
Apang, ginpasiguro nana nga haom sanda maskin anong oras nga ianunsyo eon nga may byahe ro mga domestic flights.
Eauman eon suno kana sa new normal nga maga sangkiri ro mga flights bangud sa limitado nga pasahero kamana man uwa pa it eksakto nga buean kon san-o magabalik ro mga international flights.
