Ginpaathag it Department of Social Welfare and Development ukon DSWD Region 6 nga ro Social Pension for Indigent Senior Citizen hay bukon pa it universal rason nga nagapangayo gihapon it eligibility requirement, ag limitado pa ro mataw-an bangud nakadepende raya sa budget allocation.
Suno kay Gretchen Orbista, Focal Person, Social Pension it DSWD Region VI nga raya hay proposal pa eamang .
Ro mga nakatungtong sa edad nga 60 apang uwa pa it social pension hay posibleng qualified , apang bukon eamang it edad ro ginabasehan makaron kundi maabo nga iba pang bagay.
May listahan sigon sanda kon sin-o ro mga qualified ag gina- prioritize.
Pahayag pa nana nga may mga ginapaea sanda sa listahan kun bukon eon it qualified ukon patay eun ro beneficiary.
Suno kay Orbista nga pwede magpa-eapit sa andang Satellite Office sa sueod it Provincial Capitol kung may gusto nga iklaro ukon may nakilaea sanda nga nagabaton it pension apang bukon it qualified sa nasambit nga programa para sa pagpatigayon it revalidation ukon mahimo magsueat sa andang opisina.
Nagapabilin nga P500 ro ginabaton per month it mga benepisyaryo bangud sa uwa pa kanda nag-abot ro additional budget ag nagabase sigon sanda sa guidelines.
Ginsiguro man ni Orbista nga may anda nga waiting list para sa mga uwa pa nakasueod sa nasambit nga programa nga ginapasa sa Central Office.
Mabahoe gid man nga kahilwayan kung maaprubahan ro nasambit nga universal program.
Padumdom pa nana nga tanan nga programa nga ginhimo it gobyerno hay may manami sigon nga epekto sa mga pumueoyo.
