NEWS Analysis– Ginkasa eon ro internal investigation sa nag-viral nga ‘sexy dance’ scandal sa sangka okasyon it National Bureau of Investigation (NBI) kan-o eamang, suno kay Justice Secretary Jesus Crispin Remulla.
Raya hay mag-eowas pa sa ginaduso nga imbestigasyon it Manabang Kapueungan.
Nabulabog sa nasambit nga hitabu ro NBI, matapos ro ginpatigayon nga command conference it bureau sa sangka hotel sa Manila kan-o eamang.
Nag-sorry eon man kara si NBI chief Medardo De Lemos, apang medyu bukon raya it bastante eabi eon sa women’s group nga naghambae nga medyu pagpangbastos sa kababayin-an ro hitabu.
Mas eabi pa sa nasambit nga ahensiya nga sambilog sa nagabuyot sa mga sex scandal cases it mga kababayin-an ag sexual exploitation it mga pamatan-on.
Hirit it pilang mamalidha, bukon it bastante ro sorry kundi kinahangean nga magpatuman it baeasahan bangud sa iskandalong naging tuga kara.
Sa parte ni Remulla, natumod eon sigon nana ro opisyal nga nag-imbita sa entertainers sa nasambit nga event, apang owa man nana ginpangaeanan.
Ginahueat eon lang sigon ro written explanation kara, maging ro resulta it ginpatigayon nga imbestigasyon.
Owa man sigon it pondo it ahensya nga gingamit nga pangbayad sa tatlong dancer.
‘voluntary contribution ‘ eang sigon ro ginpangbayad sa mga raya.
Apang medyu maabu ro indi makapati kara, rason nga mas gusto nanda ro madaeuman nga imbestigasyon.
Suno kay remulla kon ano kadasig ro mga naging pagbulgar nanda sa ibang mga kontrobersiyal nga kaso, dapat sigon nga madasig man nga sibakon ag pasabton ro promotor sa raya nga insidente nga nagbutang sa ahensya sa aeang-aeang nga sitwasyon.
