Mabaskog ro mga panawagan makaron nga mag-resign eon sa pwesto si South Korea President Yoon Suk Yeol matapos ro martial law shock.
Suno kay Bombo International Correspondent Yumi Kim it Daegu City nga maabu ro nakibot sa gulping pagdeklara ni Yoon it kauna-unahang martial law sa nasambit nga nasyon sa sueod it masobra sa ap-at nga dekada .
Panawagan it pilang mga mamalidha nga iga-impeach imaw kon indi eagi mag-resign.
Ro insidente hay nagtuga it mga protesta ag grabeng batikos halin sa politika.
Raya sigon hay klaru nga pag-eabag sa konstitusyon.
Madumduman nga insigida man nga ginbawi ni Yoon ro martial law matapos nga magboto ro mga mamalidha kontra sa deklarasyon.
Raya hay nagresulta sa pagkinasadya it mga nagaprotesta sa guwa it parlyamento nga nagpabilin sa lugar maskin nga maeamig ro temperatura agud nga baeabagan ro mandu ni Yoon.
Samtang, ginpahayag pa ni Kim nga ro liderato ni Yoon hay nabutang sa peligro bangud sa anang mga ginakaeakutan nga eskandalo, korapsyon, manabang rating it suporta ag banggi-anay sa oposisyon.
