KALIBO, Aklan — Linibong katawo ro gin-abisohan nga magbakwit sa southwest Japan eabi eon ro mga una sa low lying areas kasunod man it sigidas nga pagbubu it mabaskog nga uean.
Bangud kara naka-eksperyensya it maeapnagon nga pagbaha ro nasambit nga lugar.
Suno kay Bombo International Correspondent Josel Palma it Japan nga nagpang-eapaw ro mga tubi sa kasubaan ag naka-eksperyensya ro mga pumueuyo it paghugos it eugta sa mga kabukiran sa Kyushu Island.
Angot kara, kapin sa 7 katawo eon ro nailistang namatay tuga man it nasambit nga pagbaha ag nagapadayon sa gihapon ro ginapatigayon nga rescue operation it mga otoridad sa nasambit nga lugar.
Sandig sa datos it national weather agency it Japan nga may unang 402.5 milimeter nga uean ro andang na-eksperyensyahan umpisa ko Lunes sa Kurume City kun sa siin raya ro pinakamataas nga nailista sa kasaysayan it nasyon.
Samtang, nag-aywan man raya it kasamaran partikular sa pilang karsadahon ag presenteng nakaka-eksperyensya it kawad-an it suplay it kuryente sa lugar.
Sa pihak nga parte, ginapatihan it mga eksperto nga ro nasambit nga mabaskog nga pag-uean hay tuga man it climate change
