KALIBO, Aklan — Gin-imbestigahan it Sangguniang Panlalawigan it Aklan ro natabu nga sunud-sunod nga power interruption sa Isla it Boracay ko nagtaliwan nga domingo.
Suno kay Board Member Apolinar Cleope it unang distrito it Aklan nga ginpangunahan it anang Committee on Public Utilities kaibahan ro Committee on Energy ro pag-usisa sa problema.
Gintumod sigon it Aklan Electric Cooperative (Akelco) ag National Grid Corporation of the Philipppines (NGCP) nga ro ugat it problema hay bukon it power supply kundi ro nasamad nga underground power transmission line nga maeapit sa runway it Caticlan airport .
Bangud sa madaeum nga taob ag mabaskog nga humbak hay ginsueod it tubi ro underground nga transmission line rason nga nasamad.
Nagbutang sigon ro Akelco ag NGCP it it temporary nga “by-pass line” nga ginkabit sa magtimbang nga poste bilang band-aid solution.
Apang naapektuhan ro linya it mabaskog nga hangin ag humbak rason nga ginbutangan it insulator.
Angot kara, ginpasiguro it NGCP nga ginatrabaho eon it andang contractor ro pag-ayos it samad nga underground cable ag ginaeauman nga matapos sa ulihing domingo it January ukon sa unang domingo it February matapos nga gin-order pa sa ibang nasyon ro nasamad nga parte it kable.
Nauna eon nga nag-alburuto ro mga negosyante sa sunud-sunod nga power interruption bangud sa epekto kara sa andang negosyo ag sa turismo .
